Groot belangstelling en waarde by SAPPA Groentoer in Jacobsdal

Op 25 Maart het SAPPA se Groentoer by die plaas van Herlu Smit naby Jacobsdal plaasgevind, waar sowat 120 produsente en rolspelers uit die bedryf saamgetrek het vir ’n oggend van praktiese leer en kennisdeling.

Die dag het weereens bevestig hoe groot die behoefte en belangstelling is vir sulke praktiese geleenthede. Wat die Groentoer besonders maak, is nie net die inhoud nie, maar ook die geleentheid vir produsente om met mekaar te gesels, vrae te vra en ervarings te deel.

Verskeie kundiges het hul kennis gedeel oor onderwerpe soos bestuiwing, hoëdigtheidsboorde, waterverbruik en wortelontwikkeling in pekanneute. Die sessies was prakties en toepaslik, met baie interaksie vanuit die gehoor – iets wat grootliks bygedra het tot die waarde van die dag.

’n Belangrike boodskap wat duidelik na vore gekom het, is dat geen plaas dieselfde is nie. Elke produsent werk met unieke omstandighede – van grondtipes tot klimaat – en daarom is dit noodsaaklik om aan te hou leer, te toets en aan te pas. Wat vir een produsent werk, mag nie noodwendig vir ’n ander werk nie. Die sleutel lê daarin om kennis te versamel, dit toe te pas binne jou eie konteks, en dit so doeltreffend moontlik te bestuur.

Daar is ook groot waarde daarin om by mekaar te leer. Deur gesprekke en gedeelde ervarings word nuwe idees gevorm en bestaande praktyke verfyn – iets wat duidelik sigbaar was deur die aktiewe deelname van die groep.

SAPPA wil graag vir Herlu Smit bedank vir die beskikbaarstelling van sy plaas, asook vir Hardus du Toit vir die reëlings en organisasie van die dag.

’n Spesiale woord van dank ook aan al die sprekers wat hul tyd en kennis gedeel het. Julle praktiese insette en bereidwilligheid om met produsente te gesels en vrae te beantwoord, het ’n groot verskil gemaak.

Hou gerus SAPPA se nuusbriewe dop vir toekomstige Groentoere en soortgelyke geleenthede waar praktiese waarde en kennisdeling sentraal staan.