Transformasie: Van Onderwyser tot Pekanboer

Dawid van der Westhuizen van Groblershoop het vir baie jare as onderwyser in die dorp gewerk. Sy droom was egter nog altyd om eendag buite die dorp te gaan woon – op ’n plaas waar dit stiller en rustiger sou wees wanneer hy aftree.

Met dié in gedagte het hy ’n huis net buite Groblershoop in die Noord-Kaap gekoop. Saam met die huis het daar ook ’n stuk grond gekom. SAPPA het in 2016 die eerste 60 bome aan Dawid voorsien, en so het sy pekanreis begin. Hy het geleidelik die ou druiwe wat op die grond was, met pekanneute vervang.

Vandag is al 6 hektaar van sy beskikbare grond volgeplant met pekanneute. In totaal het SAPPA reeds 250 bome voorsien, en die res het Dawid self aangeskaf. Alhoewel dit nooit sy oorspronklike plan was om te begin boer nie, sê hy: “As daar grond is, hoekom nie?” Hy het intussen lusern tussen die jong bome geplant om die grond te benut en waarde toe te voeg.

Vir Dawid is dit ’n groot vreugde om jaar na jaar te sien hoe die bome groei en sterker word. Vanjaar het hy 1,7 ton neute geoes, ’n mylpaal waarvan hy baie trots is. Sy doelwit is nou om die bome so gou moontlik in vol produksie te kry.

Die pekanprojek bring vir hom baie vervulling, en hy is selfs besig om ’n nuwe huis op die plaas te bou. SAPPA wens Dawid alle sterkte toe met sy reis as pekanprodusent. Ons is saam met hom bly oor die pad wat hy reeds gestap het, en sien uit na dit wat nog voorlê.